بعد حوالي شهر طلب نتكلم في التليفون وبعدها اتقابلنا في كافيه قريب من شغلي وكان شكله عادي جدا ولبسه بسيط ومكنش بيحاول يستعرض أي حاجة قدامي ولما اتكلم عن حياته قال لي إنه اتعلم من تجربته القديمة وإنه مش عايز غير بيت مستقر وست تكون شريكة حياته بجد
أنا سألته عن سبب طلاقه فقال إن الخلافات بينه وبين مراته السابقة زادت وإن كل واحد فيهم اكتشف إنه مش مناسب للتاني ولما سألته إذا كان عنده أولاد قال لي لأ وإنه من وقتها مركز في شغله وحياته
الكلام كان مقنع بالنسبالي لكني طلبت منه من البداية إن أي خطوة بينا لازم أهلي يعرفوا عنها وإنه ييجي البيت لو إحنا ارتحنا لبعض فوافق من غير اعتراض وبعد أسبوع جه مع أخوه الكبير وقعد مع أمي وخالي واتكلم معاهم عن شغله وظروفه وكان هادي ومحترم لدرجة إن أمي بعد
ما مشي قالت لي أخيرا ربنا بعتلك ابن الحلال
خالي سأله عن أهله وعنوانه وشغله وشريف جاوب على كل الأسئلة من غير ارتباك وقال إنه عايش لوحده في شقة إيجار وإنه بيجهز نفسه للجواز على قد إمكانياته ولما طلب خالي يشوف بطاقته ويعرف بياناته مكنش عنده مانع وده خلانا نحس إن الأمور ماشية بشكل طبيعي
بعدها بدأنا نتكلم في تفاصيل الجواز وشريف قال لي إنه مش عايز يتأخر وإنه شايف إننا مناسبين لبعض وإنه مش محتاج وقت أكتر عشان يعرفني وأنا وقتها كنت خايفة من الاستعجال لكن كنت كمان خايفة إن الفرصة تضيع مني بسبب ترددي
وفي خلال شهرين تم الاتفاق على الجواز واتكتب الكتاب وسط فرحة أهلي اللي كانوا شايفين إن أخيرا بنتهم هتستقر وتعيش حياتها زي باقي البنات
يوم فرحنا شريف مسك إيدي وقال لي أنا عايزك تنسي كل اللي فات وتبدئي معايا صفحة جديدة وأنا صدقته من قلبي وقلت لنفسي يمكن كل السنين اللي فاتت كانت بتجهزني للحظة دي
لكن بعد الجواز بحوالي أسبوعين بدأت ألاحظ إن شريف مشغول طول الوقت وإنه ساعات بيكون قاعد جنبي وجسمه معايا لكن دماغه في حتة تانية وكان كل ما أسأله عن حاجة تخص شغله يقول لي إنه بيمر بفترة ضغط وإنه محتاج شوية وقت لحد ما الدنيا تستقر
في البداية مكنتش بدي الموضوع أكبر من حجمه وكنت بقول لنفسي إن أي اتنين في بداية جوازهم بيحتاجوا وقت عشان يتعودوا على بعض لكن اللي لفت نظري إن شريف كان بيتجنب الكلام عن تفاصيل يومه بشكل غريب ولما أسأله عن الناس اللي بيتعامل معاهم في شغله يجاوبني بإجابات مختصرة ويغير
الموضوع بسرعة
وفي يوم رجع البيت متأخر عن معاده المعتاد وكان واضح عليه الإرهاق ولما سألته إذا كان حصلت مشكلة في الشغل قال لي إنه اضطر يخلص شوية حاجات مهمة وإن الفترة الجاية ممكن تكون صعبة شوية من الناحية المادية
عرضت عليه إني أساعده لو محتاج أي حاجة لكنه رفض في البداية وبعدها قال لي إنه مضطر يدفع مبلغ كبير خلال كام يوم وإنه مش عايز يطلب مني حاجة لكنه مش عارف يتصرف إزاي
حسيت إن دي فرصة إني أقف جنب جوزي في وقت صعب وقررت أساعده بالمبلغ اللي طلبه من غير ما أضغط عليه بأسئلة كتير وكنت فاكرة إن الموقف ده هيقربنا من بعض أكتر
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.