### الفصل الأول أنا اسمي نادية عندي تلاتة وتلاتين سنة ومتجوزة من عشر سنين من أحمد اللي عمره ما حسسني في يوم إني أقل من أي حد ولا عمره اعترض على قسمة ربنا لما خلفت بنتي الأولى وبعدها التانية والتالتة بس المشكلة مكنتش في جوزي المشكلة كانت في سلفتي هالة مرات أخوه الكبير اللي كانت شايفة إن الدنيا كلها بتتقاس بالولد اللي يشيل اسم أبوه والفلوس اللي هتتوزع بعد عمر طويل هالة كانت متجوزة أخو أحمد اسمه سامح وعندها ولدين كريم ويوسف وكانت كل ما نتجمع عند حماتي تفتح موضوع الخلفة وتبصلي بنظرة كلها شـ,ـماتة وتقول كلام يوجع من غير ما تحس إنها بتغلط في حد كأنها بتتكلم عن حاجة عادية جدا في الأول كنت بضحك وأعدي الكلام عشان خاطر العيلة ولما خلفت بنتي التالتة جنى بدأت المعايرة تزيد وبقت هالة تتعامل معايا كأنها كسبت مسابقة وأنا خسرت فيها كانت تقعد قدام حماتي وتقول لها أنا الحمد لله ربنا كرمني بولدين عشان يبقوا سند ليا ولسامح لما نكبر إنما البنت مهما عملت آخرها بيت جوزها وبتنسى أهلها حماتي كانت ساعات تسكت وساعات تقول لها يا بنتي كلهم رزق من عند ربنا بس هالة مكنتش بتسمع غير صوت نفسها أكتر موقف وجعني حصل يوم عيد ميلاد بنتي الكبيرة ملك كانت كملت تسع سنين وعاملة لها حفلة صغيرة في البيت وعازمة أهل جوزي وأختي وولادها وكنت مجهزة كل حاجة بنفسي وأنا بوزع التورتة سمعت هالة بتقول لسامح بصوت عالي وهي بتضحك أهو يا سيدي البنات بيكبروا وييجوا يوم يتجوزوا وكل واحدة تروح لحالها إنما إحنا ولادنا دول اللي هيشيلوا اسم العيلة وبعدين بصتلي وقالت بمكر على فكرة يا نادية إنتي لازم تفكري في المستقبل شوية أصل أحمد ملوش غيرك ولو ربنا كتبلُه عمر طويل وجاب فلوس أو اشترى شقة مين هيورثه غير ولاد أخوه؟
البنات لما يتجوزوا هيبقى ليهم بيوت وأزواج يصرفوا عليهم إنما ولادنا هيبقى ليهم ورث في عمهم حسيت إن التورتة اللي في إيدي وقعت من تقل الكلام اللي سمعته وبصيت لأحمد لقيته حاطط المعلقة على الطبق ووشه اتغير تماما قال لها إنتي بتقولي إيه يا هالة؟
هو أنا مت ولا إيه عشان تتكلمي عن ورثي؟ وبعدين إنتي مين قالك إن بناتي مش هيبقوا سندي لما أكبر؟هالة حاولت تضحك وتلم الموضوع وقالت يا أحمد أنا بهزر هو إنتوا بقيتوا متحسسين من كل كلمة ليه؟
أحمد رد عليها بجدية أنا مش بهزر في حاجة تخص مراتي وبناتي ولو سمعتك بتتكلمي بالطريقة دي تاني مش هبقى ساكت اللمة اتقلبت وسامح أخد مراته ومشي وهو متضايق إن أخوه وقفها عند حدها قدام الناس وحماتي فضلت طول السهرة تحاول تهدي النفوس وأنا دخلت أوضتي بحجة إني بغير هدوم البنات وعيطت لوحدي مكنتش زعلانة عشان قالت إن ولادها هيرثوا أحمد قد ما كنت موجوعة من إنها شايفة بناتي أقل منهم وإن وجودهم في حياتي ملوش قيمة لمجرد إنهم بنات بالليل أحمد دخل عليا لقاني قاعدة جنب السرير وبمسح دموعي فقعد جنبي وقاللي أنا آسف إنك سمعتي الكلام ده في بيتنا وبين أهلنا بس أوعدك محدش هيقدر يقلل منك ولا من بناتك طول ما أنا عايش مسكت إيده وقلتله أنا مش عايزة مشاكل بينك وبين أخوك بس أنا تعبت يا أحمد كل مناسبة لازم تجرحني وكل مرة أسكت بتتمادى أكتر قاللي يبقى من النهارده مفيش سكوت عن الغلط بس في نفس الوقت مش هنخليها تبوظ حياتنا كنت فاكرة إن الموضوع هيقف عند المعايرة وإن هالة هتفهم إن ليها حدود بعد الموقف ده لكن اللي حصل بعدها بأسبوع خلاني أكتشف إن كلام الورث مكنش مجرد غيرة من الخلفة وإن هالة كانت حاطة عينها على حاجة أكبر بكتير من مجرد إنها تثبت إن ولادها أحسن من بناتي في يوم كنت راجعة من المدرسة بعد ما وصلت ملك وأخواتها ولقيت حماتي بتكلمني وبتطلب مني أروح لها ضروري ولما وصلت لقيت سامح قاعد معاها ووشه مهموم وهالة قاعدة جنبه بتعيط وبتقول إن أخو جوزي ظلمها وإنها مش هتسامح في حق ولادها ولما سألتهم في إيه حماتي بصتلي وقالت يا بنتي إحنا عايزين نحل الموضوع بالعقل قبل ما العيلة كلها تتفرق بصيت لأحمد اللي كان واقف عند الشباك ولقيته بيقوللي اقعدي يا نادية واسمعي للآخر لأن اللي هتسمعيه دلوقتي هو اللي هيحدد علاقتنا بيهم بعد كده الفصل الثاني قعدت وأنا مش فاهمة إيه اللي ممكن يكون حصل يخلي هالة تعيط بالشكل ده وسامح يبقى قاعد ساكت كأنه شايل هم كبير أحمد سحب كرسي وقعد قدامي وقاللي من فترة سامح كان عايز يشتري محل صغير يفتح فيه مشروع لنفسه وكان ناقصه مبلغ مش قليل وأنا وافقت أساعده بجزء من الفلوس اللي كنت محوشها عشان أوسع شغلي وقلتله اعتبرهم سلفة ولما ربنا يكرمك ردهم على مهلك بصيت لسامح وقلتله وإيه اللي حصل؟
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.