أول ما شافتني واقفة على باب شقتي ابتسمت وقالت لي مالك يا نادية شكلك متضايقة؟ كنت عايزة أقول لها إنتي السبب لكن لساني اتعقد وقلت لها مفيش حاجة. دخلت شقتها وبعد أقل من ساعة خبطت عليا.
فتحت لها ولقيتها واقفة قدامي من غير ابتسامتها المعتادة وقالت لي أنا عارفة إن كريم كلمك. اتنهدت وقلت لها أيوه كلمتني وعرفت المصيبة اللي إنتوا ناويين تعملوها. دخلت وقعدت وأنا واقفة قدامها وقلت لها من غير لف ودوران إنتي إزاي وافقتي على جوازة زي دي؟
إنتي مش شايفة فرق السن بينكم؟ ردت عليا وقالت لي أنا شايفاه وعارفة كل حاجة وإنتي فاكرة إني مش فكرت في الموضوع قبل ما أوافق؟ قلت لها أمال فكرتي في إيه يا سلوى؟ في ولادك؟ في كلام الناس؟
في مستقبلكم بعد عشر سنين؟ سكتت شوية وبعدين قالت لي أنا مش جاية أطلب منك توافقي غصب عنك لكن كريم راجل كبير ومن حقه يختار حياته. الكلام استفزني وقلت لها وأنا أمه ومن حقي أخاف عليه من قرار ممكن يغير حياته كلها.
بصت لي وقالت أنا عمري ما حاولت أبعده عنك ولا هعمل كده ولو وافقتي أو رفضتي مش هطلب منه يقطع علاقته بيكي. كنت لسه هرد عليها لما سمعت صوت خبط جامد على باب شقتها وصوت ابنها الكبير بيقول لها افتحي يا ماما إحنا لازم نتكلم.
قامت سلوى بسرعة وبصت لي نظرة ما فهمتهاش وخرجت. الباب اتفتح وسمعت ابنها بيقول لها إنتي فعلًا ناوية تتجوزي كريم؟ إحنا مش هنقدر نقبل بكده. ردت عليه بصوت هادي قالت له دي حياتي وأنا مش هطلب منكم تحبوا قراري لكن مش هقبل إنكم تهينوني عشانه.
ابنها الأصغر دخل في الكلام وقال لها إحنا مش بنهينك يا ماما بس إنتي عندك خمسة وأربعين سنة وهو لسه في عز شبابه إنتي متخيلة إن الجوازة دي هتستمر إزاي؟ سلوى ما ردتش عليه وفضلت واقفة قدامهم ووشها شاحب.
رجعت شقتي وقفلت الباب وأنا حاسة إن الحكاية خرجت من إيدي وإن الموضوع مش مجرد إعجاب عابر زي ما كنت بتمنى. لكن اللي خلاني أقلق أكتر إني وأنا راجعة من عندها سمعت ابنها الكبير بيقول لها جملة خلتني أقف مكاني من غير ما أحس قال لها إنتي مش هتكرري اللي حصل زمان وتضيعي حياتك عشان نفس السبب.
سلوى ساعتها صرخت فيه وقالت له اخرس ومش عايزة أسمع الكلمة دي تاني. رجعت خطوتين لورا وأنا بحاول أفهم هو يقصد إيه وإيه اللي حصل زمان وخلاها تتمسك بكريم بالشكل ده. وفي اللحظة دي كريم خرج من أوضته وراح ناحية باب شقة سلوى ولما شافني واقفة سألني إنتي بتعملي إيه هنا؟
ما عرفتش أرد عليه لأن سؤال واحد كان بيلف في دماغي هل ابني عارف سر الست دي ولا هو كمان داخل على جوازة مش فاهم حقيقتها؟الفصل الثاني
تاني يوم الصبح حاولت أتكلم مع كريم بهدوء من غير ما أحسسه إني بحاربه قلت له يا حبيبي أنا مش عايزة أخسرك ولا عايزة أفرض عليك تختار مين تتجوزها بس محتاجة أفهم علاقتك بسلوى بدأت إزاي.
اتردد شوية وبعدين قال لي إنها من حوالي سنة بدأت تتكلم معاه أكتر لما كان بيساعدها في مشاوير تخص شقتها بعد وفــ,,ـــــاه جوزها وإنه اكتشف إنها إنسانة قريبة منه وبتفهمه وإنه مع الوقت اتعلق بيها. سألته وهي قالت لك إنها بتحبك؟
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.