قال لي أيوه وإنها كانت رافضة الموضوع في البداية بسبب فرق السن لكن بعد ما اتكلموا كتير وافقت إنها تدي علاقتهم فرصة. كلامه خلاني أهدى شوية من ناحية وأقلق أكتر من ناحية تانية لأن سلوى مش ست متهورة زي ما كنت متخيلة وده معناه إنها فكرت في الموضوع فعلًا.
قررت أروح لها تاني لكن المرة دي عشان أتكلم معاها بعيد عن العصبية. لقيتها قاعدة لوحدها في الصالة وعينيها وارمة من العياط. قعدت جنبها وقلت لها أنا سمعت ابنك وهو بيقول لك إنك مش هتكرري اللي حصل زمان وإنك سكتيه لما قال كده.
وشها اتغير وقالت لي هو قال لك إيه بالظبط؟ حكيت لها اللي سمعته ففضلت ساكتة وقت طويل قبل ما تقول لي أنا كنت متجوزة قبل جوزي الراحل من شاب أصغر مني بست سنين. اتصدمت من كلامها وسألتها وإنتي كنتي متجوزة قبله؟
هزت راسها وقالت لي لا أنا ما اتجوزتوش رسمي لكن كنا مخطوبين واتفقنا على الجواز وكان فاضل كام شهر ونتجوز. أهله رفضوا بسبب فرق السن وأمه فضلت تحاربه لحد ما سابني واتجوز بنت من سنه وبعدها بفترة عرفت إنه سافر ومبقاش يسأل عن حد. قلت لها وإيه علاقة ده بكريم؟
ردت عليا وقالت لي مفيش علاقة مباشرة لكن التجربة دي وجعتني سنين وخلتني أحس إن فرق السن ممكن يضيع على الناس فرصة إنهم يعيشوا مع الشخص اللي اختاروه. اتنهدت وكملت أنا مش بتمسك بكريم عشان أنتقم من حد ولا عشان أثبت للناس إن الست لما تكبر تقدر تتجوز شاب أصغر منها.
أنا فعلًا بحبه وهو كمان بيحبني. قلت لها بس إنتي عارفة إن اللي حصل زمان ممكن يكون مأثر على قرارك وإنك بتحاولي تعوضي اللي فات. بصت لي وقالت يمكن عندك حق في جزء من كلامك وأنا مش هكدب عليكي وأقول إني ما افتكرتش الماضي لما كريم صارحني بمشاعره لكن أنا مش هتجوزه عشان أعوض خسارتي القديمة.
أنا هتجوزه لو اتأكدت إننا نقدر نعيش مع بعض من غير ما نظلــ,,ـــــم نفسنا ولا نظلــ,,ـــــم ولادنا. لأول مرة حسيت إن سلوى مش بتلعب بمشاعر ابني زي ما كنت خايفة لكن ده ما خلانيش أوافق على الجوازة بسهولة. سألتها طيب وولادك هتعملي معاهم إيه؟
قالت لي أنا حاولت أشرح لهم لكنهم شايفين إني بكرر نفس الغلطة ومش عايزين يسمعوا مني. وبعدها قالت جملة خلتني أفكر كتير أنا مش خايفة من كلام الناس يا نادية أنا خايفة أكون أخيرًا لقيت حد بيحبني بجد وأضيعه بإيدي لمجرد إني خايفة من اللي حصل زمان.
رجعت بيتي وأنا مش عارفة أقول لكريم إيه ولا أقول لسلوى إيه. وبعد يومين حصلت مواجهة أكبر لما ابنها الكبير جه عندنا وطلب يقابل كريم. قعدوا في الصالة وأنا دخلت المطبخ أسيبهم يتكلموا لكن صوتهم وصل لي.
ابن سلوى قال لكريم إنت فاهم إنك لو اتجوزت أمي مش هتبقى جوزها وبس إنت كمان هتبقى في موقف غريب وسطنا وإحنا في سنك تقريبًا. كريم رد عليه وقال له أنا مش داخل بيتكم عشان أبقى أبوكم ولا عشان آخد مكان حد أنا عايز أتجوز أمكم وأعاملها كويس.
ابنها قال له طب لو بعد كام سنة لقيت نفسك عايز أطفال وهي مش قادرة تخلف؟ ولو هي تعبت وإنت لسه صغير؟ ولو اختلافاتكم كبرت؟ ساعتها هتعمل إيه؟ كريم سكت شوية وبعدين قال له أنا مش هقدر أضمن المستقبل لأي حد لكن أقدر أضمن إني مش داخل الجوازة دي تسلية ولا عشان أضايق حد.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.